Një familje me pesë anëtarë në fshatin Trebinjë të Pogradecit ka mbetur e pastrehë pasi banesa e tyre u përfshi nga flakët mbrëmjen e së hënës. Zjarri, që dyshohet të jetë shkaktuar nga një shkëndijë elektrike në çati, ka shkrumbuar plotësisht shtëpinë, duke u marrë familjarëve të gjitha orenditë dhe sendet personale.
Pavarësisht ndërhyrjes së shpejtë të zjarrfikësve dhe banorëve të lagjes Qosollë, banesa është djegur e tëra. Fatmirësisht, nuk ka pasur të lënduar nga flakët, por dëmet materiale janë totale.
Agron Qose, kryefamiljari, rrëfen momentet dramatike kur nisi zjarri:
“Rreth orës 4 ishim në shtëpi me gruan. Dëgjuam një kërcitje në çati, por nuk i dhamë rëndësi. Vetëm kur na thirri komshiu, dilni se u dogjët, kuptuam çfarë po ndodhte. Brenda pesë minutash ra çatia përdhe, u shembën tavanet dhe nuk mundëm të shpëtonim asgjë. Erdhi zjarrfikësja, por nuk patën mundësi të bënin shumë. Madje një zjarrfikës u aksidentua duke u rrëzuar teksa po luftonte me flakët.” – tha kryefamiljari.
Kryetari i Bashkisë së Pogradecit, Ilir Xhakolli, që vizitoi familjen në vendngjarje, premtoi mbështetje institucionale:
“Agron, shyqyr që nuk ka ndodhur dëme në njerëz dhe bagëti. Jam sot këtu me grupin e emergjencave për të evidentuar dëmet. Brenda ligjit do të bëjmë gjithçka që të ta ringrejmë shtëpinë. Të uroj gjithë të mirat, Zoti të dhëntë shëndet, se të tjerat do t’i rregullojmë.” – tha Xhakolli.
Aktualisht, familja Qose po strehohet tek të afërmit në fshat, ndërsa ndodhen në kushte të vështira dhe kanë nevojë të menjëhershme për veshmbathje dhe ushqime bazë.
