Qeveria ka ndërmarrë një hap të rëndësishëm në përpjekjet për të joshur të rinjtë të studiojnë në disa degë që ishin drejt shuarjes, për shkak të mungesës së interesit. Bëhet fjalë për degë të mësuesisë, degë të profilit bujqësor, turizmit dhe disa profile inxhinierike më fushën minerare dhe mjedisit.
Qeveria vendosi të ofrojë bursa, në vlerën e pagës minimale, me shpresën se do ti joshë të rinjtë të bëhen mësues matematike, fizike, kime, dhe gjuhë-letërsie. Por edhe për tu bërë agronomë, veterinerë, zooteknikë dhe punonjës të industrisë së turizmit.
Bujqësia është sot në kërkesë të madhe për specialistë, pasi prej vitesh diplomohen një numër fare modet studentësh. Ndërsa mësuesia, në disa universitete është mbyllur dhe në UT vuan nga cilësia e studentëve.
Sipas njoftimit të Ministrisë së Arsimit:
- Bursat e studimit janë me vlerë sa paga minimale dhe do të shpërndahen duke vendosur kuota për çdo universitet publik, për t’i dhënë më shumë mundësi studentëve të të gjitha universiteteve publike;
- Ndryshe nga viti i kaluar, ku kriter ishte mesatarja e shkollës së mesme mbi 8.5, këtë vit përfitues të këtyre bursave do të jenë studentët pavarësisht notës mesatare, por gjithmonë duke plotësuar kriteret e pranimit për çdo program studimi, njësoj si të gjithë studentët e tjerë;
- Studenti përfitues nuk ka detyrimin të ruajë mesataren e shkollës së mesme, me të cilën ka përfituar bursën, me qëllim që mbështetja financiare të zgjasë përgjatë gjithë periudhës së studimeve;
