Operatori i Shpërndarjes së Energjisë Elektrike (OSHEE) ka bërë me dije se Fideri 6 i nënstacionit Mollas vijon të ketë defekte si pasojë e motit të keq të ditëve të fundit. Si rezultat, aktualisht pa energji elektrike kanë mbetur zonat Ballabanov, Panarit, Treskë dhe Grabockë, duke prekur rreth 50 familje.
Sipas OSHEE, grupet e punës ndodhen në terren dhe po punojnë intensivisht për lokalizimin dhe eliminimin e defektit në këtë nënstacion, me qëllim rikthimin sa më të shpejtë të furnizimit me energji.
Gjatë këtyre ditëve, reshjet e dendura dhe era e fortë kanë shkaktuar probleme të shumta në rrjetin elektrik në disa zona të qarkut Korçë, ku shpesh janë raportuar ndërprerje të energjisë për shkak të dëmtimeve të linjave ajrore dhe izolatorëve. OSHEE apelon për mirëkuptim, duke siguruar se ekipet teknike do të vijojnë punën deri në normalizimin e situatës.
