Në kuadër të festave kombëtare, Pazari i Vjetër i Korçës u gjallërua nga një koncert i veçantë ku performuan 14 këngëtarë dhe instrumentistë të veshur si partizanë
Repertori përfshinte këngë patriotike të vjetra, duke rikthyer atmosferën e dikurshme të korit të partizanëve.
Hasan Malolli, ish-drejtor i Pallatit të Kulturës dhe ish pjesëtar i korit të partizanëve në Korçë, përmendi emrat e artistëve të shquar që kanë dalë nga këto kore ndër vite.
“Kori Partizan u Krijua rreth viteve 65-70, nuk pati jetëgjatesj por atë periudhë zhvilloi shumë koncerte, unë isha pjesëtar i këtij kori, me këtë kor kanë kënduar me pas Piro Sulioti, Neli Morava, kanë qenë në këtë kor. E ngriti me iniciativë një prej pedagogëve të muzikës që kishte ardhur nga Sofje, Ilo Evro. Ai kishte për natyre të tij të këndonte veç pjesëve operistike dhe këngët partizane.”
Ndërsa Zamira Kita, drejtoresha e Qendrës së Artur dhe Kulturës vuri theksin te rëndësia e Korçës si një qendër turistike, e cila në këto ditë festive mirëpret vizitorë nga e gjithë Shqipëria dhe më gjerë.
“Është 80 vjetori i Çlirimit të atdheut, është përvjetor I shënuar e I rëndësishëm për gjithë shqiptarët. Kemi patur 112 vjetorin e pavarësisë. Zjarr e flakë menduam një koncert në Pazari me zjarr ashtu si dikur partizanët tanë, patriotike, madje para koncertit u kënduan dhe serenatat.”
Koncerti ishte një përzierje e traditës, artit dhe frymës atdhetare, duke bërë që festa të ndjehej kudo në qytet
