Ndërmarrja e Shërbimeve Publike në Bashkinë Korçë po vijon punën intensive për pastrimin e kanaleve kulluese dhe vaditëse përgjatë tokave bujqësore, në përgatitje për sezonin e ardhshëm të vaditjeve. Aktualisht, punimet janë fokusuar në njësitë administrative Mollaj, Drenovë dhe Bulgarec, ku kanë nisur që prej 5 ditësh dhe do të vijojnë deri në përfundimin e plotë të tyre.
Ky pastrim i kanaleve është shumë i rëndësishëm për funksionimin optimal të sistemit të vaditjes, duke siguruar furnizimin me ujë për fermerët e zonës. Fermerët lokalë vlerësojnë punën e kryer deri tani, duke theksuar se nuk kanë pasur probleme gjatë sezonit të vaditjes.
Në këto toka bujqësore kultivohen kryesisht elbi, gruri, misri, drufrutorë dhe bimë medicinale, duke përbërë burim jetese për shumë familje në zonë.
Sipas burimeve nga Ndërmarrja e Shërbimeve Publike, deri tani janë pastruar 28 km kanale kulluese dhe 9 km kanale vaditëse, ndërsa përgjatë tokave janë vendosur edhe 196 tombino që shërbejnë edhe si ura kalimi për fermerët.
Ky investim dhe mirëmbajtje e infrastrukturës ujore është një hap i rëndësishëm për përmirësimin e kushteve të punës dhe rritjen e prodhimit bujqësor në rajonin e Korçës.
