Në aksin rrugor Lozhan–Mesmal të bashkisë Maliq ka përfunduar pastrimi i masivit shkëmbor në pikën më kritike të bllokimit, ku rrëshqitjet e ditëve të fundit kishin sjellë vështirësi serioze në lëvizje. Aktualisht, punonjësit dhe mjetet e Bashkisë Maliq po vijojnë punimet për heqjen e inerteve të depozituara në shtratin e rrugës nga ujërat e përroit, në një tjetër segment të këtij aksi.
Sipas informacionit zyrtar, puna në terren ka nisur që prej ditës së djeshme dhe po kryhet me intensitet të lartë, me qëllim garantimin sa më shpejt të kalueshmërisë për përdoruesit e rrugës. Paralelisht, ekipet po punojnë edhe për hapjen e degëzimit të rrugës që lidh fshatrat Velçan, Selcë dhe Niçë, zona ku lëvizja aktualisht paraqet vështirësi si pasojë e rrëshqitjeve të dherave.
Autoritetet vendore theksojnë se angazhimet do të vijojnë deri në rikthimin e plotë të qarkullimit dhe normalizimin e situatës në të gjithë segmentin e prekur.
