Në Njësinë Vendore të Kujdesit Shëndetësor në Korçë, shumë fëmijë të moshave 1 dhe 5 vjeç ende nuk e kanë kryer vaksinën MMR, që mbron ata nga sëmundjet e fruthit, rubeolës dhe shytave. Arsyet e moskryerjes së kësaj vaksine lidhen kryesisht me frikën se ajo shkakton autizëm, një teori që nuk është vërtetuar kurrë shkencërisht.
Mjeku pediatër Theodhor Disho, gjatë një deklarate për mediat, bëri thirrje për ndërgjegjësimin e prindërve, duke i inkurajuar ata që t’i çojnë fëmijët e tyre në qendrat shëndetësore për të kryer vaksinën sipas kalendarit të vaksinimit.
Theodhor Disho, mjek pediatër: “Vaksina MMR është e sigurt dhe e nevojshme për të mbrojtur fëmijët nga sëmundje të rrezikshme. Prindërit duhet të jenë të informuar dhe të ndërgjegjësohen për rëndësinë e kësaj vaksine.”
Autoritetet shëndetësore kanë paralajmëruar se nëse fëmijët nuk kanë kryer të gjitha vaksinat e kërkuara sipas kalendarit kombëtar të vaksinimit, ata do të penalizohen dhe nuk do të lejohen të frekuentojnë çerdhe, kopshte apo shkolla. Kjo masë ka si qëllim të mbrojë shëndetin e komunitetit dhe të sigurojë mbrojtjen e fëmijëve nga sëmundjet infektive.
