Kapshticë – Në prag të festës së Pashkës, pika kufitare e Kapshticës po përjeton një fluks të shtuar të qytetarëve që kthehen në Shqipëri për të kaluar festat pranë familjarëve të tyre. Emigrantët shqiptarë që jetojnë e punojnë në Greqi, por edhe më gjerë, kanë nisur të rikthehen në atdhe për të festuar me të afërmit një nga festat më të rëndësishme të besimit të krishterë.
Sipas burimeve zyrtare, për të përballuar fluksin në rritje, në pikën doganore të Kapshticës janë vendosur në funksion nga 6 sportele aktive në të dy krahët e kufirit, duke shërbyer pa ndërprerje për të lehtësuar kalimin e udhëtarëve. Masat janë shtuar që prej mëngjesit të sotëm dhe do të vijojnë gjatë gjithë fundjavës, kur pritet që kulmi i hyrjeve të shënohet të shtunën dhe të dielën e Pashkës.
Autoritetet shqiptare të Doganës dhe Policisë Kufitare, në bashkëpunim të ngushtë me autoritetet greke, janë në gatishmëri të plotë 24 orë në ditë, duke monitoruar situatën dhe garantuar një proces kalimi sa më të qetë, të rregullt dhe me kohë pritjeje sa më minimale për qytetarët.
Përveç rritjes së stafit dhe sporteleve aktive, janë marrë masa shtesë edhe për kontrollin e automjeteve, duke ndarë linjat e udhëtarëve nga ato të mjeteve të mallrave, në mënyrë që të mos krijohen bllokime të panevojshme. Po ashtu, janë rritur patrullimet në zonën kufitare për të garantuar sigurinë dhe për të parandaluar çdo situatë të papritur.
Festat e Pashkës janë një moment i veçantë bashkimi për shumë familje shqiptare, ndaj autoritetet kanë bërë thirrje për mirëkuptim dhe respektim të udhëzimeve të stafit kufitar, me qëllim që lëvizja në kufi të zhvillohet në mënyrë sa më të rregullt dhe festive.
