Bernard Rexhollari, 18 vjeç, i plagosur rëndë mbrëmjen e djeshme në aksin rrugor Pogradec–Buçimas, është dërguar me urgjencë drejt Spitalit të Traumës në Tiranë, pasi gjendja e tij u konsiderua kritike.
I riu ka pësuar hematomë të fortë në kokë, ndërsa ndodhet nën kujdesin e mjekëve në repartin e reanimacionit. Sipas burimeve spitalore, megjithëse kishte me vete skafandër mbrojtëse, ai nuk e kishte vendosur atë në momentin që udhëtonte me motor.
Policia po heton rrethanat e ngjarjes në dy pista: mundësinë e një rrëzimi aksidental të motorit; përplasjen me një mjet tjetër nga pas, pasi mjeti me dy rrota ka shenja goditjeje në pjesën e pasme, dëmtime që nuk përputhen me një rrëzim të thjeshtë.
Për zbardhjen e plotë të dinamikës, janë sekuestruar kamerat e sigurisë të disa bizneseve përgjatë segmentit rrugor ku ndodhi ngjarja.
Ndërkohë, familjarët e 18-vjeçarit ndodhen pranë tij në Tiranë, në pritje të përmirësimit të gjendjes shëndetësore.
