Dy vatra të qëllimshme zjarri janë aktivizuar mbrëmjen e së shtunës në njësinë administrative Dardhas, midis fshatrave Grunjas dhe Prenisht, duke përfshirë sipërfaqe me bimësi dushku.
Menjëherë pas raportimit të zjarreve, mbi 15 forca nga shërbimi pyjor dhe zjarrfikës, së bashku me banorët e zonës, kanë ndërhyrë në orët e para të mëngjesit për të izoluar dhe shuar flakët. Aktualisht, dy vatrat janë izoluar dhe fikur plotësisht, ndërsa situata po monitorohet nga afër për të shmangur riaktivizimin e tyre.
Ndërkohë, forcat zjarrfikëse po punojnë për të izoluar një vatër të tretë zjarri në zonën e Prenishtit, e cila është raportuar mëngjesin e së dielës. Sipas informacioneve nga terreni, situata është nën kontroll dhe nuk raportohet për dëme të mëdha materiale apo në njerëz.
Autoritetet kanë nisur hetimet për të identifikuar dhe ndjekur penalisht personin që dyshohet se ka vendosur qëllimisht zjarret. Kujtojmë se një ditë më parë, dy vatra zjarri ishin aktive edhe në njësinë administrative Çerravë, të cilat janë izoluar dhe fikur pa shkaktuar dëme të mëdha.
