Kryetari i Bashkisë Pogradec, Ilir Xhakolli, së bashku me deputetin e zgjedhur Bledi Çomo, pritën në një takim pune homologun e Bashkisë Kastoria, Giannis Korentsidis. Takimi u zhvillua në Pogradec dhe kishte në fokus forcimin e marrëdhënieve mes dy qyteteve fqinje, përmes projekteve të përbashkëta kulturore dhe turistike.
Gjatë bisedimeve, palët ranë dakord për nënshkrimin e një marrëveshjeje bashkëpunimi dhe për organizimin e eventeve rinore, sportive dhe kulturore. Një tjetër pikë e rëndësishme e diskutimit ishte nxitja e turizmit përmes bashkëpunimit me agjencitë greke, me qëllim sjelljen e vizitorëve të huaj në Pogradec, duke ndjekur modelin e suksesshëm të agjencive që tashmë prej dy vitesh sjellin mijëra turistë gjermanë në qytet.
Të dy kryebashkiakët shprehën vullnetin dhe angazhimin e plotë për të kthyer këto diskutime në projekte konkrete, që do të kontribuojnë në zhvillimin ekonomik dhe kulturor të përbashkët.
