Një sportist nga Maqedonia e Veriut ka marrë ndihmën e Policisë Kufitare shqiptare, pasi gjatë një fluturimi me paraglajder, për shkak të erës së fortë, kishte devijuar dhe rrezikonte të binte në territorin e fshatit Alarup, në Pogradec.
Pas njoftimit të marrë nga komandanti i Shën Naumit, shërbimet e Drejtorisë Vendore të Kufirit dhe Migracionit Korçë reaguan menjëherë duke lokalizuar sportistin, shtetasin V. P., i cili fatmirësisht ndodhej në gjendje të mirë shëndetësore.
Më pas, ai u shoqërua nga policia drejt Pikës së Kalimit Kufitar të Tushemishtit, prej nga kaloi në Maqedoninë e Veriut.
Sportisti shprehu falënderime për reagimin e shpejtë dhe profesionalizmin e forcave të policisë.
Policia Kufitare thekson se mbetet e angazhuar maksimalisht në shërbim të qytetarëve, vizitorëve dhe turistëve, duke ftuar këdo që ndodhet në vështirësi të kontaktojë menjëherë në numrin pa pagesë 112.
