Shërbimet e Komisariatit të Policisë Pogradec kanë referuar materialet në Prokurori, ku është nisur procedim penal ndaj dy të miturve, të moshës 16 vjeç, të dyshuar për shpërndarjen e fotove të një vajze 16-vjeçare në rrjetet sociale.
Sipas policisë, të miturit dyshohet se kanë publikuar imazhet pa pëlqimin e vajzës, duke cenuar të dhënat dhe jetën e saj private. Ngjarja është regjistruar pas kallëzimit të bërë nga familjarët e të miturës.
Materialet e çështjes i janë referuar Prokurorisë pranë Gjykatës së Shkallës së Parë të Juridiksionit të Përgjithshëm Korçë, ku vijojnë hetimet për zbardhjen e plotë të rrethanave dhe përgjegjësive ligjore.
Policia apelon për ndërgjegjësim mbi rrezikun e shpërndarjes së materialeve personale në rrjetet sociale, veçanërisht kur përfshihen të mitur, duke kujtuar se veprimet e tilla përbëjnë vepër penale.
