Kjo fundjavë ka qenë fillimi i shtimit të fluksit të pushuesëve dhe vizitorëve që kanë ardhur në juglindje të vendit. E bashkë me pushuesit kanë ardhur edhe dhjetra ankesa në adresë të kolibri.al sa i përket qenve të rrugës të cilët po pushtojnë çdo qytet.
Fundjava ka qenë shqetësuese për ata që qëndruan në Pogradec pasi 2-3 tufa qensh në shumë raste edhe agresivë kishin pushtuar shëtitoren dhe lulishten e qytetit liqenor.
Në ankesat e tyre qytetarët shprehen se; “Jemi në Pogradec, erdhëm për fundjavë por nuk po qëndrojmë dot. Në zonat kryesore të qytetit ka qen agresivë të cilët po na trembin ne dhe fëmijët. E çuditshme është se nuk ka asnjë punonjës bashkie që të tentojë ti kapë dhe ti largojë. Ne vijmë për qetësi në këtë qytet por nuk po pushojmë dot, pasi duket qartë që puntorët kanë marrë pushimet”
Ndërsa një tjetër qytetar thotë: “E tmershme çfarë po shoh në Pogradec, qyteti dhe pastërtia në maksimum, por nuk po i shijojmë dot pasi i kan zaptuar qentë rrugaçë. Bashkia të reagojë“.
Të interesuar pranë bashkisë Pogradec na u tha se: “Punohet vazhdimisht për kapjen e qenve rrugaçë dhe sterilizimin e tyre, mirpo ditët e fundit në mënyrë të pakuptueshme ata janë shtuar shumë. Kemi dyshime se na i sjellin me makina gjatë orëve të natës dhe i lëshojnë. Është një fenomen që ma ndodh çdo vit. Kemi kërkuar që policia bashkiake të zgjatë oraret e monitorimit, por kemi kërkuar edhe ndihmën e policisë së shtetit për të bërë të mundur identifikimin e këtyre mjeteve. Do punojmë ta zgjidhim edhe situatën e krijuar gjatë këtyre ditëve, kërkojmë mirëkuptim nga qytetarët deri në zgjidhje pasi nuk është një problem që zgjidhet lehtë thanë burime nga bashkia Pogradec“.
Prania e qenve endacakë në rrugë është mjaft evident në këtë periudhë si në Pogradec ashtu edhe në Korçë, ndërsa nuk kanë munguar as rastet e sulmeve nga këta qen ndaj qytetarëve dhe fëmijëve në mënyrë periodike.
