Në lagjen nr. 3 të qytetit të Pogradecit vijon puna për termoizolimin e pallateve, një investim që synon të përmirësojë cilësinë e jetesës së banorëve dhe të rrisë efikasitetin energjetik të ndërtesave. Ky projekt, që zbatohet me sistemin kapot, është pjesë e një programi më të gjerë urban për një Pogradec më të qëndrueshëm dhe më bashkëkohor.
Përmes kësaj ndërhyrjeje, banorët përfitojnë drejtpërdrejt nga ulja e konsumit të energjisë për ngrohje dhe ftohje, si dhe nga reduktimi i kostove mujore. Izolimi i ndërtesave përmirëson mbrojtjen ndaj lagështirës dhe ndikimeve të motit, ndërkohë që rritet edhe vlera e tregut për çdo njësi banimi.
Ndërhyrja ka një ndikim të dukshëm në pamjen urbane, duke sjellë një transformim estetik që i jep lagjes një pamje më të rregullt dhe moderne. Ky investim është dëshmi e angazhimit të Bashkisë për të përmirësuar jetesën në çdo lagje të qytetit, me fokus të veçantë te standardet e qëndrueshme dhe mbrojtjen e mjedisit. Punimet do të vijojnë edhe në zona të tjera të Pogradecit, në funksion të një transformimi të plotë urban dhe social.
