Agim Dandallaku këngëtari pogradecar është vlerësuar në 70 vjetorin e tij të lindjes nga bashkia Pogradec me Certifikatë Mirënjohje për kontributin e tij dhjetra vjeçar në interpretimin e muzikës qytetare dhe popullore pogradecare.
Agim Dandallaku është me origjinë nga Devolli por i rritur në Pogradec. Në periudhën e komunizmit ai ka punuar si mekanik më ofiçinën shtetërore për shumë vite me radhë. Që kur ishte nxënës në shkollë ai kishte spikatur për zërin melodioz dhe mënyrën si këndonte dhe vazhdimisht mësuesit e aktivizonin në koncerte të ndryshme.
Për shumë vite me radhë Agimi është angazhuar në estradën amatore të qytetit dhe bashkë me Ermira Babaliun e shumë emra të tjera ka dhënë shfaqje në të gjithë Shqipërinë. Ai nuk e pati fatin tw ndiqte shkollën e arteve apo të muzikës por sërish nuk u nda nga ky zhanër duke vijuar të këndojë vazhdimisht.
Edhe pse sot 70 vjeç për asnjë moment Dandallaku nuk është shkëputur nga muzika. Në çdo event apo koncert që bëhet në Pogradec, ai nuk mungon.
Bashkia njoftoi se artisti u vlerësua si më poshtë:
Në këtë 70-vjetor të lindjes së këngëtarit të qytetit Z. Agim Dandallaku vlerësuam me Certifikatë Mirënjohje kontributin e tij dhjetra vjeçar(prej 1972) në këndimin e këngës qytetare e popullore pogradecare. Gimi është nga ata artistë që rrallë i vjen një komuniteti dhe Pogradeci ka patur fatin ta ketë në gjirin e vet.
Gëzuar Agim, zëri juaj unikal qoftë gjithmonë himn për ata që dëgjojnë interpretimet tuaja.
