Pas dy muajsh hetime intensive me metoda proaktive, është finalizuar nga DVP Korçë operacioni policor i koduar “Last Night”, i zhvilluar në bashkëpunim me Prokurorinë e Juridiksionit të Përgjithshëm Korçë.
Operacioni u përqendrua në një apartament të marrë me qira në lagjen nr. 1 të qytetit të Pogradecit, i cili ishte përshtatur për ushtrimin e prostitucionit. Si rezultat i veprimeve hetimore, u arrestua në flagrancë shtetasja kineze H. F., 61 vjeçe, ndërsa një tjetër shtetase kineze, C. L., 46 vjeçe, u shpall në kërkim ndërkombëtar.
Në cilësinë e provës materiale u sekuestruan para në valuta të ndryshme, kartëmonedha të dyshuara si të falsifikuara dhe katër aparate celularë që dyshohet se përdoreshin për komunikime dhe reklama të veprimtarisë së kundërligjshme.
Ndërkohë, është proceduar penalisht në gjendje të lirë edhe pronari i apartamentit, shtetasi L. Xh., 33 vjeç, për veprën penale “Mbajtja e lokaleve për prostitucion”.
Hetimet po vijojnë për të identifikuar persona të tjerë të përfshirë në këtë rrjet, brenda dhe jashtë vendit, që dyshohet se kanë ndihmuar apo kanë qenë pjesë aktive në zhvillimin e kësaj veprimtarie kriminale.
Materialet procedurale i janë kaluar Prokurorisë për veprime të mëtejshme ligjore.
