Qyteti liqenor i Pogradecit ka çelur sot zyrtarisht sezonin turistik veror me një sërë aktivitetesh kulturore, sportive dhe argëtuese, duke sjellë gjallëri, ngjyra dhe energji pozitive në qytet. Nën organizimin e Bashkisë së Pogradecit, dita nisi me parakalimin e bandës frymore në rrugët kryesore, duke krijuar një atmosferë festive që u pasua nga vizita në panairet lokale dhe ekspozitat artizanale.
Kryetari i Bashkisë Ilir Xhakolli theksoi përgatitjen e operatorëve turistikë për të ofruar shërbime cilësore, mikpritje tradicionale dhe një sezon të suksesshëm për të gjithë vizitorët. “Pogradeci është gati të mirëpresë pushuesit me ofertë të pasur turistike, natyrë të mrekullueshme dhe një verë plot ngjarje kulturore”, u shpreh ai.
Në vijim, grupi artistik i Qendrës Kulturore “Lasgush Pogradeci” solli një program të larmishëm me këngë, valle folklorike, kërcim modern dhe pjesë instrumentale, duke pasuruar atmosferën me elemente të trashëgimisë kulturore dhe moderne.
Aktivitetet kanë vijuar në gjithë qytetin, përfshirë koncerte të vogla nga nxënësit përgjatë shëtitores, gara me kanoe, ndeshje futbolli në rërë dhe basketboll, si dhe shfaqje të hapura nga Teatri i Kukullave dhe demonstrime të arteve marciale nga grupi “Pogradeci Kung Fu”.
Përmbyllja e ditës do të kulmojë me koncertin e mbrëmjes që nis në orën 19:00 me performancën e një DJ, e më pas, nga ora 19:30 deri në 21:30, në skenën qendrore do të ngjiten artistë të njohur si Eli Fara, Mimoza Shaholli, Rajmond Gusho, Parodistët e Vlorës, vëllezërit Edmond dhe Fatmir Murraj, si dhe iluzionisti italian Luigi Fiorentino, të cilët do të sjellin emocione, humor dhe argëtim për publikun vendas dhe turistët.
Ky aktivitet shënon fillimin simbolik të verës pogradecare dhe një ftesë të hapur për pushuesit që të zbulojnë bukuritë dhe mikpritjen e këtij destinacioni të veçantë në juglindje të Shqipërisë.
