Qyteti liqenor i Pogradecit është gati të presë nesër edicionin e radhës të “Festës së Koranit”, një aktivitet që prej dy vitesh ka hyrë në kalendarin kulturor dhe turistik të zonës, duke u kthyer në një traditë që bashkon banorë dhe vizitorë nga e gjithë Shqipëria e rajoni.
Programi i festës nis në orën 18:30, me hedhjen e rasatit të koranit në ujërat e liqenit të Ohrit, si një simbol i ruajtjes së kësaj specieje unike dhe të çmuar. Aktivitetet do të vijojnë në orën 19:00 me konkursin e gatimit të koranit, ku do të prezantohen receta tradicionale e moderne të këtij peshku që përfaqëson identitetin gastronomik të Pogradecit. Paralelisht, vizitorët do të kenë mundësinë të ndjekin edhe një ekspozitë me materiale që pasqyrojnë historinë e peshkimit në vite.
Atmosfera do të kulmojë në mbrëmje, kur në orën 20:00 skena e Odeonit do të ndizet me një koncert festiv, ku do të performojnë emra të njohur të muzikës shqiptare si Marsela Çibukaj, Ardit Çuni, David Dreshaj dhe DJ Nolin Aliçkaj.
Edhe këtë vit, festa synon të promovojë jo vetëm pasurinë natyrore dhe kulinare të Pogradecit, por edhe turizmin kulturor, duke e bërë qytetin një destinacion të preferuar në fund të sezonit veror.
