Drejtoria Vendore e Policisë Korçë ka vënë në lëvizje strukturat e saj gjatë 24 orëve të fundit, duke evidentuar një sërë shkeljesh që variojnë nga drejtimi i automjetit në gjendje të dehur, konfliktet fizike, posedimi i lëndëve narkotike, deri tek ushtrimi i lojërave të fatit në mënyrë të paligjshme. Të gjitha materialet janë referuar në Prokurori për veprime të mëtejshme.
Sipas burimeve zyrtare, Specialistët e Sektorit të Qarkullimit Rrugor arrestuan në flagrancë 58-vjeçarin F. M., banues në fshatin Vashtmi, i cili u kap duke drejtuar automjetin në gjendje të dehur. Policia thekson se kontrollet vijojnë në të gjithë qarkun, me fokus drejtuesit që rrezikojnë sigurinë rrugore.
Ndërsa në aksin “Podgorie–Vreshtas”, një tjetër rast u referua në Prokurori për shtetasin A. L., 41 vjeç, nga Alarupi, i cili humbi kontrollin mbi motomjetin që po drejtonte dhe u dëmtua lehtë. Sipas Policisë, shkak i aksidentit dyshohet të ketë qenë pakujdesia e drejtuesit.
Në fushën e luftës kundër narkotikëve, Specialistët e Hetimit të Narkotikëve njoftuan se ka nisur procedimi penal ndaj 31-vjeçarit K. R., banues në Libonik. Gjatë kontrollit fizik nga shërbimet e Komisariatit Maliq, atij iu gjet një sasi lënde narkotike e dyshuar kanabis sativa, e cila u sekuestrua në cilësinë e provës materiale.
Një tjetër ngjarje e regjistruar nga Policia e Korçës lidhet me një konflikt fizik. Sipas të dhënave zyrtare, shtetasit E. A. (34 vjeç) dhe E. A. (33 vjeç), të dy nga Bulgareci, janë konfliktuar me shtetasin R. P., 30 vjeç, duke përdorur sende të forta. Në procedim është përfshirë edhe shtetasi D. S., 30 vjeç, i cili ndodhej në vendngjarje, por nuk njoftoi organet kompetente. Konflikti dyshohet të ketë lindur për motive të dobëta.
Ndërkohë, në territorin e Maliqit, shërbimet policore kanë ndërhyrë në dy ambiente të administruara nga shtetasit N. H., 29 vjeç, dhe Xh. Sh., 31 vjeç, ku gjatë kontrollit u zbuluan pajisje që përdoreshin për lojëra fati, të cilat u sekuestruan. Në këtë rast ka nisur procedimi penal për ushtrim të veprimtarisë së paligjshme.
Policia e Korçës njofton se operacionet dhe kontrollet do të vijojnë pa ndërprerje, me synim rritjen e sigurisë publike dhe parandalimin e veprimtarive të kundërligjshme në të gjithë qarkun.
