Në kuadër të programit kombëtar “Siguria e të rinjve”, shërbimet e Policisë së Korçës po zhvillojnë një cikël takimesh sensibilizuese me nxënësit e shkollave 9-vjeçare dhe të mesme të qarkut, në bashkëpunim me Ministrinë e Brendshme dhe Ministrinë e Arsimit dhe Sportit.
Takimet e fundit u organizuan në shkollën 9-vjeçare “Stavri Toçi” në fshatin Ravonik të Korçës dhe në shkollën jopublike “Nehemia” në Buçimas të Pogradecit, ku morën pjesë nxënësit e klasave të 6-ta.
Gjatë bashkëbisedimeve, u trajtuan tema me rëndësi për moshën e tyre, si dhuna dhe format e saj, bullizmi dhe pasojat që sjell, rreziqet e përdorimit të internetit, si dhe rëndësia e respektit dhe komunikimit pa dhunë. Për ta bërë takimin më tërheqës, policia përdori materiale vizuale, video dhe foto, ndërsa nxënësve iu shpërndanë fletëpalosje informuese.
Ky program synon të edukojë brezin e ri me vlera qytetare, të rrisë ndërgjegjësimin për rreziqet që mund të hasin dhe të forcojë bashkëpunimin mes policisë, shkollës dhe familjes, për një komunitet më të sigurt.
