Dy efektivë të Policisë së Shtetit, inspektorët Benjamin Hysi dhe Pëllumb Cangëtari, u nderuan me “Certifikatën e Karrierës” nga Drejtori i Përgjithshëm i Policisë, Ilir Proda, me rastin e daljes së tyre në pension. Ceremonitë e dorëzimit u zhvilluan në ambientet e DVP Korçë dhe Komisariatit të Policisë Devoll, ku u lexua motivacioni për “merita të veçanta, profesionalizëm dhe përkushtim në shërbim të Policisë së Shtetit”.
Në emër të Drejtorit Vendor të Policisë Korçë, kryekomisar Ramiz Hyemti vlerësoi kontributin 32-vjeçar të dy punonjësve, duke theksuar korrektësinë dhe rezultatet e arritura gjatë karrierës së tyre. Nga ana tjetër, Hysi dhe Cangëtari falënderuan drejtuesit për vlerësimin, duke e konsideruar certifikatën një shenjë respekti për punën e tyre ndër vite.
