Teatri “Andon Z. Çajupi” në Korçë do të mirëpresë një nga ngjarjet më të rëndësishme artistike të fundvitit, me premierën e musical-it “Katedralja”, bazuar në romanin e pavdekshëm të Viktor Hygosë, një kryevepër e letërsisë botërore që vjen në një formë të re skenike, të mbushur me muzikë, emocione dhe interpretim dramatik.
“Katedralja” rrëfen një histori madhështore dashurie, sakrifice dhe fati, ku personazhet e fuqishëm dhe konflikti njerëzor marrin jetë përmes këngës, koreografisë dhe një realizimi artistik të kujdesshëm. Ky produksion synon të ofrojë një përjetim të veçantë jo vetëm për artdashësit korçarë, por edhe për vizitorët që ndodhen këto ditë në qytetin e serenatave.
Premiera do të shfaqet më 28 dhe 29 Dhjetor, në orën 19:00, në skenën e Teatrit “Andon Z. Çajupi”. Musical-i mban firmën regjisoriale të Xhuliano Briskut, me koreografi nga Artan Ibershimi, udhëheqje muzikore nga Artur Vera dhe orkestrime nga Laert Qazimi. Kostumet janë realizuar nga Dhespina Cani, ndërsa skenografia nga Beqo Nanaj.
Në role interpretojnë: Arsi Bako, Amri Hasanlliu, Gerald Murrja, Donald Shehu, Mateus Frroku dhe Gloria Nure, të shoqëruar nga një trupë balerinësh që i jep dinamizëm dhe gjallëri çdo momenti skenik.
“Katedralja” pritet të jetë një nga shfaqjet më të spikatura të sezonit artistik dimëror në Korçë, duke premtuar një mbrëmje arti, emocionuese dhe të paharrueshme për publikun.
