Prefektura e Qarkut Korçë, në bashkëpunim me gjashtë bashkitë e rajonit, ka ndërmarrë nismën për ngritjen e një qendre të përbashkët rezidenciale që do t’u vijë në ndihmë kategorive në nevojë.
Shërbimet dhe kategoritë përfituese
Nisma u diskutua gjatë një takimi me Drejtorin e Politikave dhe Koordinimit Territorial pranë Ministrisë së Punëve të Brendshme, Arben Xhaferi, ku u theksua nevoja për një zgjidhje të unifikuar në nivel qarku. Struktura e re synon të ofrojë strehim, përkujdesje shëndetësore dhe shërbime sociale për fëmijët në situatë rruge, të moshuarit dhe personat me aftësi të kufizuara, me qëllim sigurimin e kujdesit të nevojshëm dhe integrimin e tyre social.
Grupi ndërinstitucional dhe hapat e radhës
Të gjashtë bashkitë e territorit kanë konfirmuar dakordësinë për t’u përfshirë në këtë mekanizëm të përbashkët. Për jetësimin e projektit pritet ngritja e një grupi pune ndërinstitucional me përfaqësues nga Ministria e Punëve të Brendshme, Ministria e Financave, Ministria e Shëndetësisë dhe Mirëqenies Sociale, si dhe bashkitë përkatëse.
Ky grup do të përcaktojë formën juridike të bashkëpunimit mes bashkive dhe mënyrën e funksionimit të strukturës. Aktualisht projekti ndodhet në fazën e diskutimit dhe formalizimit, ndërsa hapi pasues do të jetë përcaktimi i skemës së financimit dhe organizimi i shërbimeve që do të ofrohen.
