Familja është strehë dhe forca më e madhe ku një fëmijë mund të rritet i sigurt, i dashur dhe i pranuar. Në Korçë, çifti i bashkëshortëve, Ariana dhe Tomi, kanë hapur zemrën dhe derën e familjes së tyre për të mirëpritur dy fëmijë, motër e vëlla, të cilët më parë jetonin në një institucion rezidencial.
Ky gjest fisnik tregon se dashuria prindërore dhe kujdesi familjar janë dhurata më e madhe që mund t’u jepen fëmijëve – stabilitet, përkujdesje dhe ndjesinë e përkatësisë.
Bashkia Korçë, përmes Shërbimit Mbështetës për Fëmijët dhe Familjen dhe në partneritet me ARSIS, UNICEF Shqipëri dhe Ministrinë e Shëndetësisë dhe Mbrojtjes Sociale, mbështet fuqimisht kujdesin alternativ familjar, duke e konsideruar atë si një mundësi të çmuar që çdo fëmijë të ketë një shtëpi të ngrohtë e një të ardhme më të mirë.
Ky është vetëm një hap, por një hap i madh, drejt një komuniteti më të ndjeshëm, më të barabartë dhe më të dashur për fëmijët.
