Ambasada Amerikane ka dalë me një njoftim të rëndësishëm pas qarkullimit në rrjet për një të ashtuquajtur projekt “Let’s Talk Together About US24”, që ofron udhëtime falas në SHBA ose viza pa pagesë.
Ambasada e SHBA bën me dije se ky njoftim është një “mashtrim”, dhe u bën thirrje qytetarëve shqiptare të tregojnë kujdes.
“Shërbimi i Sigurisë Diplomatike i Departamentit të Shtetit të SHBA do të vazhdojë të punojë me Policinë e Shtetit teksa ajo heton përmasat e kësaj skeme mashtruese. U bëjmë thirrje të gjithë shqiptarëve të jenë të kujdesshëm ndaj mashtrimeve që garantojnë udhëtime falas në Shtetet e Bashkuara, si dhe viza amerikane pa pagesë ose me kosto të ulët. Gjithashtu, i bëjmë thirrje kujtdo që të kontaktojë Ambasadën e SHBA nëse dyshon se ndonjë person ose organizatë përpiqet të paraqesë veten në mënyrë të gënjeshtërt si të lidhur me ambasadën”, njofton Ambasada e SHBA.
