Pas më shumë se 60 ditësh pa reshje dhe temperatura që kapërcyen 40 gradët, pasditja e sotme solli një kthesë të fortë për klimën në Korçë. Reshje të dendura shiu, të shoqëruara me stuhi të fuqishme, përfshinë fushën e qytetit dhe zonat përreth, duke dhënë një frymëmarrje të shumëpritur për natyrën dhe bujqësinë.
Sipas specialistëve të sektorit bujqësor, shiu i sotëm ka ardhur në momentin e duhur, pasi rezervat ujore për vaditje ishin drejt ezaurimit. Ujitja e tokave ishte bërë thuajse e pamundur në shumë zona, ndërsa fermerët kishin nisur të ndjenin pasojat e motit ekstremisht të thatë.
Ndikim pozitiv pritet edhe për vatrën e zjarrit në Parkun Kombëtar të Prespës, ku flakët në majën e Malit të Thatë kishin qenë aktive për disa ditë me radhë, por ndërhyrja nga toka ishte thuajse e pamundur për shkak të terrenit të thepisur malor. Reshjet mund të ndihmojnë në shuarjen graduale të zjarrit dhe në parandalimin e përhapjes së mëtejshme.
Fatmirësisht, deri më tani nuk raportohet për dëme në kulturat bujqësore, ndërsa fermerët dhe banorët e zonës e kanë pritur me lehtësim këtë ndërrim të befasishëm të motit, i cili shpresohet të sjellë edhe një rregullim klimatik më të favorshëm në ditët në vijim.
