Në fshatin Kamenicë po vijojnë punimet për rikonstruksionin e kanalit kryesor që mbledh përrenjtë e zonës, një investim i financuar nga Bashkia Korçë me fondet e emergjencave civile. Ky kanal, i cili prej vitesh ka shkaktuar probleme për banorët për shkak të daljes së ujit nga shtrati gjatë reshjeve, po rikonstruohet për të shmangur përmbytjet dhe për të rritur sigurinë në zonë.
Punimet po kryhen në një gjatësi prej 585 metrash, ku kanali po betonizohet për të përmirësuar rrjedhjen e ujërave, ndërsa 210 metra të tij do të mbrohen me gabione për të forcuar strukturën dhe për të minimizuar erozionin. Pas përfundimit të rikonstruksionit, përgjatë kanalit do të shtohen hapësira të gjelbëruara dhe një trotuar, duke sjellë një ndryshim pozitiv për cilësinë e jetesës së banorëve të Kamenicës.
Banorët shprehen të kënaqur me këtë ndërhyrje, duke e cilësuar atë si një investim të domosdoshëm që do të mbrojë shtëpitë dhe pronat e tyre.
