Reshjet e dëborës kanë rënë gjatë natës në juglindje të vendit, ndërsa në orët e para të mëngjesit janë kryer punime për pastrimin dhe kriposjen e rrugëve. Dëborë e pakët është shënuar në lartësitë mbi 1350 metra mbi nivelin e detit, ndërsa në akset e tjera janë regjistruar reshje të lehta shiu, pa krijuar probleme për qarkullimin.
Mëngjesin e sotëm dëborë ka rënë sërish në fshatin turistik të Dardhës, si edhe në zonat e Shtyllës dhe Mashkullorës. Trashësia e dëborës varion nga 2 deri në 5 centimetra, ndërsa akset rrugore mbeten të hapura dhe të kalueshme.
Firmat nënkontraktore po vijojnë punën për pastrimin dhe kriposjen e rrugëve, ndërkohë që policia rrugore apelon për kujdes të shtuar dhe pajisjen e mjeteve me goma dimërore, veçanërisht për turistët që udhëtojnë drejt Dardhës, Voskopojës dhe Vithkuqit.
Sipas sinoptikanëve, temperaturat në zonat malore gjatë ditës së sotme do të zbresin deri në -5 gradë Celsius, ndërsa gjatë kësaj jave priten reshje dëbore me intensitet më të lartë dhe temperatura që mund të arrijnë deri në -10 gradë Celsius.
