Tradita e pasur muzikore e Kolonjës do të celebrohet sërish këtë vit me Festivalin Folklorik Tipologjik Kombëtar të Sazeve Popullore. Dhjetëra grupe muzikore nga qytete të ndryshme të Shqipërisë do të mblidhen për të sjellë meloditë autentike popullore përmes instrumenteve tradicionale, duke ruajtur dhe promovuar trashëgiminë muzikore të vendit.
Eventi do të zhvillohet më 29 dhe 30 shtator në Leskovik, si dhe më 1 tetor në Ersekë, duke filluar nga ora 18:00. Ky festival, i kthyer tashmë në një traditë të rëndësishme, pritet të tërheqë jo vetëm banorët vendas, por edhe vizitorë të shumtë, duke ofruar një përvojë unike të muzikës dhe kulturës shqiptare.
