Pas disa vitesh mungesë, futbolli rikthehet në qytetin e Ersekës. Klubi historik “Gramozi” do të ringjallet falë një marrëveshjeje të re mes Bashkisë së Ersekës, Federatës Shqiptare të Futbollit dhe biznesmenit italian Gerardo Masucci, i cili pritet të bëhet pronari i ri i klubit.
Sipas burimeve pranë FSHF-së, marrëveshja përfshin pagesën e 100 milionë lekëve nga ana e investitorit italian, ndërsa stadiumi do të mbetet në pronësi të Bashkisë së Ersekës.
Në arritjen e kësaj marrëveshjeje ka pasur një rol të drejtpërdrejtë Presidenti i FSHF-së, Armand Duka, si edhe kryetari i Bashkisë Ersekë, Erion Isai.
Vendimi përfundimtar pritet të miratohet nesër nga Këshilli Bashkiak i Ersekës, duke i hapur rrugë zyrtarisht rikthimit të Gramozit në futbollin shqiptar.
Ekipi Gramozi ka lënë gjurmë në historinë e sportit shqiptar, me ndeshjen e paharrueshme miqësore ndaj Real Madridit në “Qemal Stafa” dhe me pjesëmarrjen në Kategorinë e Parë deri në vitin 2012.
Pas disa viteve mungesë dhe vështirësish financiare, projekti i ri me mbështetje italiane dhe bashkiake duket se do të rikthejë emocionet e futbollit në qytetin e vogël juglindor.
