Godina historike e Bankës Kombëtare Tregtare, një nga monumentet më të rëndësishme të qytetit, është restauruar dhe i është kthyer qytetarëve me pamjen e saj të dikurshme plot shkëlqim.
Në kuadër të 100-vjetorit të themelimit të bankës, u inauguruan zyrtarisht mjediset e brendshme të godinës së rikonstruktuar, në një ceremoni ku morën pjesë drejtues të institucionit, përfaqësues të biznesit dhe bordi drejtues.
Për herë të parë, publiku pati mundësinë të shohë mobiljet origjinale të projektuar nga arkitekti i njohur italian Gio Ponti, të cilat kanë qenë pjesë e zyrës së parë drejtuese një shekull më parë.
Ky restaurim i jep Korçës një vlerë të re historike, arkitektonike dhe kulturore, duke e shndërruar godinën e BKT-së jo vetëm në një kujtesë të së shkuarës, por edhe në një pasuri të gjallë për brezat e ardhshëm.
