Këshilltari i Këshillit Bashkiak të Korçës, Lazjon Petri, ka ngritur alarmin për gjendjen shqetësuese të një ndërtese tradicionale në lagjen historike të Mitropolisë, e cila është shembur pjesërisht pa respektuar asnjë protokoll sigurie.
Në një reagim publik në rrjetet sociale, Petri bën me dije se është informuar nga një qytetar i cili ka dërguar edhe foto nga vendngjarja, ku shihen trarë, kolona druri dhe gurë të rrezikshëm që qëndrojnë pezull, duke përbërë një kërcënim të drejtpërdrejtë për jetën e qytetarëve që kalojnë në rrugicat e zonës.
“Old is gold – po jo të na ngelet gold-i në fyt nga mungesa e përgjegjshmërisë dhe profesionalizmit,” shkruan Petri, duke theksuar se autoritetet duhet të ndërhyjnë menjëherë për të garantuar sigurinë dhe respektimin e ligjit, sidomos kur bëhet fjalë për objekte të trashëgimisë kulturore.
Ai i bën thirrje Bashkisë së Korçës dhe strukturave përgjegjëse që të marrin masa urgjente për eliminimin e rrezikut dhe për mbrojtjen e trashëgimisë historike të qytetit, si dhe u bën apel qytetarëve që të mos heshtin, por të denoncojnë raste të ngjashme.
Lagjja e Mitropolisë konsiderohet një nga zonat më të vjetra dhe me vlera të veçanta historike dhe arkitektonike në qytetin e Korçës.
