Reshjet e fundit kanë ndikuar pozitivisht në rritjen e nivelit të ujëmbledhësve në qarkun e Korçës, duke kaluar gjysmën e kapacitetit të tyre. Parashikimet për reshje të tjera intensive gjatë javës që vjen pritet të rrisin më tej sasinë e ujit të disponueshëm për vaditje.
Autoritetet kanë ndërmarrë gjithashtu masa për pastrimin e kanaleve vaditëse, me qëllim që procesi të vijojë pa probleme. Një ndër rezervuarët më të rëndësishëm në zonë, ujëmbledhësi i Gjançit, ka arritur në rreth 15 milionë metër kub ujë nga kuota maksimale prej 17 milionë m³.
Sipas të dhënave nga Drejtoria e Ujitje-Kullimit në Korçë, ky ujëmbledhës furnizon me ujë të dy krahët e fushës së Korçës: nga krahu i majtë kanalet që nga fshati Pulahë deri në Melçan, dhe nga krahu i djathtë nga Floqi deri në Drenovë. Në këtë zonë, fermerët kultivojnë kryesisht drufrutorë dhe perime si qepë, lakra, patate dhe misër, dhe deri më tani nuk kanë pasur mungesë uji për vaditje.
Ndërkohë, burime nga Ndërmarrja e Shërbimeve Publike të bashkisë Korçë bëjnë të ditur se me fillimin e sezonit të vaditjes, do të ngrihen tre prita në lumin Dunavec, në afërsi të fshatrave Turan, Voskop dhe Bulgarec, për të siguruar ujë në parcelat bujqësore të fushës së Korçës.
Aktualisht, në qarkun e Korçës administrohen rreth 120 rezervuarë me funksion ujitjen e tokave bujqësore, duke e kthyer këtë infrastrukturë ujore në një aset të rëndësishëm për bujqësinë vendase.
