Shërbimi psikologjik që ofrohet në qendrat shëndetësore po kthehet në një ndihmë të vyer për qytetarët, teksa gjithnjë e më shumë persona kërkojnë mbështetje për të përballuar vështirësitë emocionale dhe mendore. Të dhënat tregojnë se pjesën më të madhe të të trajtuarve e përbëjnë të moshuarit, ndërsa nuk mungojnë as rastet e fëmijëve dhe të rinjve që kërkojnë ndihmë për ankth, vështirësi komunikimi apo probleme të tjera të zhvillimit emocional dhe social.
Albert Çepi, punonjës social në një prej qendrave, thotë se për të moshuarit problem më i madh mbetet vetmia, një realitet i shpeshtë që shpesh çon drejt gjendjeve të ankthit dhe depresionit.
Albert Çepi – Punonjës social
“Shumë të moshuar përballen me vetminë, mungesën e komunikimit dhe mbështetjes familjare. Kjo ndikon drejtpërdrejt në gjendjen e tyre emocionale dhe mendore.”
Në një kohë kur sfidat mendore janë të pranishme në çdo grupmoshë, mbështetja psikologjike që ofrohet në qendrat shëndetësore shihet si një hallkë e rëndësishme për forcimin e mirëqenies së qytetarëve dhe krijimin e një shoqërie më të shëndetshme.
