Shtëpia e artit e ndërtuar nga Eni dhe Henri, është një hapësirë unike dhe e veçantë për artdashësit e Pogradecit.
Një shtëpi, një lokal, një hapësirë e qetë dhe komode për të lexuar, pikturuar apo dhe kënduar, kjo ishte dëshira e çiftit pogradecar, të cilët e arritën.
“ShpellArt” është vendi ku shumë nga artistët e juglindjes por jo vetëm gjejnë veten por edhe banorët e qytetit liqenor.
Sipërmarrësja Eni Guçi tregon se ky vend shërben për të gjithë që duan të shprehin emocionet e tyre në art.
“Merrem me muzikë këtu, edhe pse ska lidhje shkolla që kam bërë. Organizohen mbrëmje LIVE, bashkohen njerëz që janë dashamirës të muzikës, nuk është se unë këndoj e ti dëgjon. Kush ka nevojë e do, vjen dhe këndon vet. Pogradeci është vend i dashur për mua, kam parë që ka piktorë, ka shkrimtarë, është vend dashamirës ndaj artit, kam vënë re që e ndjekin”, tha Guçi.
Sipërmarrësi Henri Shkurti tregon se Pogradecit i duhej një shtëpi arti dhe funksionet e saj janë të ndryshme.
“Shtepia e artit nisi si një mendim i brendshëm e me pas kaluan kohë e vite e tani me mundësitë tona u materlaizua. Jo vetëm Pogradecit por çdo njeriu i dihet një shtëpi arti brenda vetes. Arti i jep zhvillim të brendshëm dhe të jashtëm.
Ne këtu organizojmë aktivitete kulturore, piktorë, vizatim, muzikë, letërsi, aktrim dhe presim se shpejti dhe përveç kësaj i kemi ofruar dashamirësve të artit që në këtë portë të pijnë një gotë verë, kafe”, tha Shkurti.
Përpos liqenit e qetësisë që duket sikur buron nga Mali i Thatë në qytetin e Lasgushit, tanimë çdokush në atë qytet mund të ndihet pak artist brenda vetes.
