Kultivoi 1150 rrënjë drogë në Greqi, Interpol identifikon përmes ADN shqiptarin.
Rreth dy vjet e gjysmë më vonë, me ndihmën e ADN, autoritetet greke arritën të identifikonin një nga kultivuesit e plantacionit të marijuanës në zonën e Rogdias, në një zonë pyjore në pronësi të Manastirit Savvathian, në mal.
Siç u bë e ditur, bëhet fjalë për një 31-vjeçar shqiptar, të cilit iu gjet materiali gjenetik dhe gjurmët e gishtërinjve në disa nga provat e sekuestruara, të cilat u identifikuan me asistencën e Interpolit dhe aplikacionin SIRE nëpërmjet Francës, pasi shqiptari kishte shqetësuar edhe autoritetet atje.
Kujtohet se plantacioni i madh i identifikuar në shtator 2022 ishte rritur në dy pjesë dhe përbëhej nga 1150 fidanë, deri në tre metra të lartë, në pjekuri të plotë. Përveç qindra fidanëve, Policia e Heraklionit gjatë operacionit konfiskoi edhe 27 kilogramë kanabis të tharë.
