E bukura e Devollit” kjo është fjalia që përdoret gjerësisht nga banorët e zonës për fshatin e Sinicës. E vendosur 22 km larg nga Bilisht në Malsinë e Devollit Sinica është nga ato fshatra karakteristikë e cila ka çfarë ofron për turistët dhe vizitorët.
Shtëpitë karakteristike me gur të gdhendur dhe dru, çatitë me pllaka guri, kalldrëmet e rrugicave të brendshme, urat e gurit deri tek kishat qindra vjeçare janë një panoramë e shpejtë për atë sr çfarë mund të gjesh në këtë fshat kaq autentik. Sinica përgjatë viteve të fundit ka vuajtur largimin masiv të banorëve kjo pasi rruga që të çonte për në këtë fshat ishte pa infrastrukturë dhe për pasojë hemorragjia e largimeve nuk e kurseu.
Nga 750 banorë që kishte dikur sot aty jetojnë vetëm 10 familje.Vitet e fundit ky fshat është përfshirë në progamin e 100 fshatrave turistikë dhe si i tillë ka përfituar një prej investimeve më jetike, rrugën.Me financim të Fondit të Zhvillimit rruga është asfaltuar dhe kjo ka hapur një faqe të re për banorët.
Falë rrugës Sinica ka nisur të vizitohet tashmë nga vendasit dhe të huajt, më së shumti nga Korça, Devolli dhe Tirana janë njerzit që vijnë në fshat vizitojnë atë, shijojnë gatimet tradicionale por interesohen edhe për blerje banesash.
Dajlan Hysolli i cili mund të cilësohet xhevairi i parë i agroturizmit në Sinicë thotë se kërkesat janë gjithmonë e në rritje.Sinica bashkë me Qytezën, Arrzën dhe Nikolicën janë destinacione mjaft interesante 4 stinore, së fundi në zonë është duke u bërë edhe një studim për ndërtimin e një kompleksi dimëror skish e cila sigurisht e kthen një një konkurent të madh në rajon Devollin.
Dimiri dhe dëbora në këto fshatra është i mrekullueshëm.Sinica ka nisur të ringrihet, bashkë me të dhe Qyteza e Nikolica, banorët që dikur ikën për shkak të mungesës së shërbimeve tashmë po kthehen, kjo vërehet edhe nga rikonstruksioni i banesave në fshat. Kërkesat për blerje janë rritur çfarë nënkupton se në këto zona pritet të ketë një lulëzim të bujtinave të cilat do të përkthehen në të ardhura për banorët. Tashmë Devolli falë kësaj rruge vjen si një tjetër ofertë mjaft tërheqëse për turistët vendas dhe të huaj.
