Situata e zjarrit në Parkun Natyror të Gërmenjit paraqitet më e qetë gjatë 24 orëve të fundit, sipas burimeve zyrtare të Prefekturës së Korçës. Nuk janë shënuar vatra të reja, megjithatë sipërfaqja e prekur është zgjeruar edhe më shumë.
Në terren vijojnë të jenë rreth 65 forca të MZSH Kolonjë, të Drejtorisë Rajonale të Zonave të Mbrojtura, Policisë Kufitare, shërbimit pyjor dhe vullnetarë, të mbështetur edhe nga efektivë të ushtrisë së repartit të Drenovës. Ky angazhim konsiderohet i domosdoshëm pasi një ditë më parë flakët depërtuan në zonën e mbrojtur të pyllit, duke rritur ndjeshëm riskun për përhapje.
“Besojmë që falë kësaj përpjekjeje sot situata të normalizohet, ndërkohë që shpresojmë të na favorizojnë edhe reshjet e shiut, pasi parashikimi i motit është me vranësira,” – theksojnë burime nga Prefektura.
Megjithatë, e vetmja mundësi për izolimin e plotë të zjarrit mbetet ndërhyrja nga ajri, duke qenë se terreni është i vështirë dhe flakët kanë prekur thellësisht zonën pyjore të mbrojtur.
