Skënderbeu ka nisur në mënyrën më të mirë të mundshme sezonin e ri në Kategorinë e Parë, duke fituar me rezultat të pastër 3-0 ndaj Burrelit. Ndeshja u zhvillua në stadiumin “Skënderbeu” në Korçë, ku atmosfera ishte elektrizuese, me praninë e qindra tifozëve që krijuan një mjedis festiv dhe spektakolar me kore, flamuj dhe drita.
Korçarët kaluan në avantazh në pjesën e parë falë Naserit, i cili u tregua i saktë nga pika e bardhë e penalltisë. Pas pushimit, Tayo dyfishoi rezultatin duke çuar entuziazmin në tribuna në kulm, ndërsa kapiteni Çuçka, me eksperiencën dhe vendosmërinë e tij, vulosi fitoren me golin e tretë.
Me këtë sukses, ekipi i drejtuar nga trajneri Ernest Gjoka siguroi tre pikë të arta në javën e parë dhe tregoi se është i vendosur ta luftojë fort këtë kampionat për t’u rikthyer aty ku e ka vendin, në elitën e futbollit shqiptar.
