Skënderbeu i femrave ka marrë një fitore të pastër dhe plot autoritet në Tiranë, duke mposhtur Partizanin me rezultatin 0-3 në ndeshjen e javës së katërt të Kupës së Shqipërisë. Skuadra korçare dominoi takimin nga fillimi në fund, duke mos lënë asnjë hapësirë reagimi për të kuqet vendase.
Partizani u përpoq të qëndronte në lojë, por superioriteti i Skënderbeut u pa qartë në të gjitha setet, të cilat u mbyllën me epërsi të sigurt në favor të vajzave bardhekuqe. Me këtë triumf, Skënderbeu ngjitet në kuotën e 9 pikëve në Grupin A, duke kapur Pogradecin në renditje – skuadër që ka një ndeshje më pak dhe do të përballet nesër me Korabin.
Duke parë ecurinë dhe ritmin e skuadrave, gjithçka tregon se Pogradeci dhe Skënderbeu janë dy pretendentet e qarta për të siguruar biletën e gjysmëfinaleve të Kupës së Shqipërisë. Vajzat korçare, ndërkohë, konfirmojnë se këtë sezon janë një hap përpara Partizanit, duke marrë një fitore që flet vetë.
