Specialisti i njohur i atletikës në Korçë, Juxhin Çili, është prezantuar zyrtarisht si përgatitës atletik i ekipit të vajzave të volejbollit të Skënderbeut. Pas konfirmimit të trajnerëve Olsi Haxhillari dhe Julian Shishi në pankinë, klubi vazhdon të ndërtojë një staf teknik të konsoliduar, duke i shtuar emra me eksperiencë në fushën e përgatitjes fizike.
Çili është një ndër figurat më të vlerësuara në atletikën korçare, me një karrierë të gjatë si trajner dhe edukator sportistësh në disiplina të ndryshme. Ekspertiza e tij e thelluar mbi mekanikën e trupit, stërvitjen funksionale dhe ndërtimin e qëndrueshmërisë fizike pritet të sjellë një ndikim të rëndësishëm në rritjen e performancës së vajzave të Skënderbeut.
Ky zhvillim është një hap i rëndësishëm për klubin korçar, që këtë sezon synon jo vetëm rezultate më të mira, por edhe ngritjen e standardeve profesionale. Me një staf teknik të plotësuar dhe të koordinuar, volejbolli i vajzave te Skënderbeu ka si objektiv rikthimin në elitën e sportit shqiptar.
