Skënderbeu është finalisti i dytë i kampionatit kombëtar të volejbollit për femra, duke u bashkuar me Tiranën në garën për titullin kampion. Korçaret siguruan biletën për në finale pas një ndeshjeje vendimtare me Pogradecin, e cila ashtu si sfida e mëparshme, u vendos në setin e pestë.
Në përballjen e dytë të gjysmëfinales, zhvilluar në Pogradec, ishin liqenoret që triumfuan në setin final me rezultatin 15-13. Por në takimin e tretë, vendimtar, zhvilluar në Korçë, Skënderbeu dominoi setin e pestë me shifrat e thella 15-3, duke mbyllur llogaritë dhe kaluar në finale.
Trajneri i korçareve Orlando Koja dhe kapitenia Elena Bego kanë vlerësuar maksimalisht lojën e liqenoreve, edhe pse shprehen se Skënderbeu e meritonte më tepër finalen.
Për një nga lojtaret me te rëndësishme pogradecare si Paola Gjata, është arritje që u rikthye fryma e volejbollit në qytet bashkë me tifozët ndërsa tregon se tanimë Pogradeci do të shohë vetëm objektiva për lart.
Finalja për titullin kampion mes Skënderbeut dhe Tiranës do të jetë një seri emocionuese, ku titulli do të shkojë tek skuadra që arrin të fitojë tre ndeshje. Takimi i parë do të luhet në Korçë, ndërsa më pas përballja do të zhvendoset në Tiranë. Nuk përjashtohet mundësia që seria të shkojë në pesë ndeshje, duke premtuar spektakël maksimal për tifozët e volejbollit shqipar.
