Skënderbeu i kategorisë superiore pritet të jetë krejt ndryshe nga ai i kategorisë së parë.
Korçarët jovetëm duan të qëndrojnë gjatë në këtë kategori, por më tepër se kaq, duan të ringjiten edhe njëherë tjetër në majë të futbollit shqiptar. Për ta arritur këtë ata janë në kërkim të futbollistëve cilësorë, lojtarë të cilët kanë marrë më parë edhe miratimin e serbit të pankinës korçare Ivan Gvozdenviç.
Burime të siguruara thanë se bëhet fjalë më së shumti për futbollistë afrikanë një pjesë e të cilëve luajnë në ekipe italiane.
I njëjti burim bëri me dije se lojtarë të tjerë të piketuar nga pankina korçare priten të jenë nga kampionati ynë me të cilët paraprakisht presidenti Ardian Takaj ka rënë dakord.
Në total bëhet fjalë për më shumë se 10 futbollistë të huaj dhe shqiptarë të cilët mendohen të veshin fanellën bardh e kuq të Skënderbeut. Të gjithë këta lojtarë i përkasin repartit të mbrojtjes dhe mesfushës, por Skënderbeu është në kërkim edhe të dy sulmuesëve.
Deri tani korçarët kanë pasur kontakte me tre futbollistë të portës por burimi tha se biseda ka shkuar më tej me një portier që ka luajtur me një nga skuadrat e njohura në kampionatin italian.
Megjithë këto lëvizje Skënderbeu duket një skuadër në ndërtim e sipër për të arritur në majë dhe për të riprekur Europën.
