Skënderbeu ka arritur një fitore të rëndësishme në Ballsh, duke mposhtur Bylisin me rezultatin minimal 0-1, në kuadër të javës së 9-të të Kategorisë Superiore. Goli i vetëm i takimit u realizua nga Ermir Rashica, i cili u shpall edhe “Lojtari i Ndeshjes.”
Pas sfidës, Rashica u shpreh i lumtur për kontributin e tij, duke theksuar rëndësinë e vazhdimësisë në formë:
“Jam shumë i kënaqur që ndihmova ekipin tim të ngjitet më lart në renditje. Këto 4 gola në 3 javë më japin besimin se ky mund të jetë sezoni im më i mirë. Do të bëj maksimumin në çdo ndeshje.”
Rashica foli gjithashtu për forcat mbrojtëse të kampionatit, duke përmendur disa nga rivalët më të fortë:
“Ka ekipe me mbrojtje shumë të organizuara, por do të veçoja Partizanin, Dinamon dhe Egnatian si skuadrat me mbrojtjet më të mira. Unë përpiqem të jap kontribut në të dyja fazat e lojës, si në mbrojtje ashtu edhe në sulm.”
I pyetur për të ardhmen e tij te Skënderbeu, Rashica theksoi:
“Kam ende dy vite kontratë me Skënderbeun. Për momentin, jam i fokusuar tek detyrat e mia në ekip, por le të shohim se çfarë do të ndodhë në të ardhmen.”
