Skuadra e Skënderbeut do të zbresë sot në fushë për të zhvilluar ndeshjen e dytë miqësore të verës, në kuadër të përgatitjeve për sezonin e ri futbollistik. Përballë korçarëve në stadiumin juglindor, në orën 19:00, do të jetë Besa e Kavajës.
Pas humbjes 0-4 ndaj Strugës në takimin e parë testues, ku trajneri provoi shumë nga elementët e rinj dhe ndryshoi formacionin gjatë lojës, kjo sfidë e dytë pritet t’i shërbejë më shumë konsolidimit të grupit dhe vlerësimit të performancës individuale të lojtarëve.
Skënderbeu po punon intensivisht për të ndërtuar një skuadër konkurruese, ndërsa ndeshje të tilla miqësore janë një mundësi për të parë nga afër ritmin e ekipit dhe harmonizimin e repartit ofensiv me mbrojtjen.
Sfida ndaj Besës pritet të jetë edhe një test më i vështirë, përballë një kundërshtari tradicional të kampionateve shqiptare, që gjithashtu po përgatitet seriozisht për sezonin që po afron.
