Qendra për Hapje dhe Dialog dhe Qendra e Arteve dhe Kulturës, Korçë, në oborrin e “Mësonjëtores” kanë nisur një cikël bashkëpunimesh mbi praktikimin dhe përjetimin e artit dhe emocioneve që e pasojnë atë tek brezat e rinj.
Nën moderimin e Katerina Çifligut, të rinjtë pjesëmarrës në projektin “Teatri i të Rinjve” patën mundësinë të shpalosin angazhimin e tyre për muajt korrik-gusht. Gjatë kësaj periudhe, ata do të zhvillojnë praktikën e ndarë në dy faza: atë të provës dhe të premierës me titull “Funny Money”. Të rinjtë folën për përvojën e re dhe emocionet e të qenurit pjesë e botës së teatrit, duke treguar disa pjesë nga skenat që pritet të shfaqen në fund të muajit gusht. Këto pjesë teatrare vijnë nën kujdesin e regjisorit të ri Ergis Dervishi.
Nën kujdesin e drejtueses së Qendrës së Artit dhe Kulturës, Korçë, Blerta Belliu, ky aktivitet synon përfshirjen e një sërë disiplinash artistike dhe çështjeve me impakt kulturor dhe social për Rajonin e Korçës.
