Duket padyshim shumë e vjetër… urbanistika e fshatit Lin (Lihn) është e kolauduar shumë saktë në shekuj, artikuluar ritmikisht në mënyrë radiale ndaj perimetrit të gadishullit të Shën Kollit (sot përgjithësisht thuhet Linit).
Çdo grup shtëpish ja del të përfundojë në liqen nëpërmjet një rrugice të shtruar me dhé të ngjeshur e çakëll, në fund të së cilës është gjithnjë barka e grupit përkatës.
Shtëpitë, jo më shumë se dy kate, janë prej guri të punuar, të lidhur me baltë të kuqërremtë (gjë që i jep ngjyrën karakteristike gjithë fshatit) dhe të përforcuara me breza të drunjtë horizontale çdo një metër. Çatitë janë thuajse të gjitha me tjegulla dhe strehë të ngushta.
Secila syresh ka një kopësht të vogël ngjitur (backyard) ose në afërsi, dhe një më të madh jashtë fshatit, të cilat janë ekonomia ndihmëse bujqësore, krahas peshkimit tradicional.
Ps. Kohët e fundit janë bërë disa objekte tre-katëshe që ja kanë prishur harmoninë e vjetër peizazhit të fshatit. Shpresojmë që kjo prirje të dekurajohet sa më shpejt.
Shkruar nga Artan Shkreli
