Në mjediset e Universitetit “Fan S. Noli” në Korçë u zhvillua një aktivitet i dedikuar traditave, elementeve etnografike dhe trashëgimisë kulturore të pakicave maqedonase, arumune dhe rome, një nismë e organizuar nga Shoqata Maqedonase “Sonce” në bashkëpunim me Komitetin për Pakicat Kombëtare.
Takimi u mbajt në Bibliotekën “Kongresi i Manastirit” të Fakultetit të Edukimit dhe Filologjisë dhe u hap nga prof. as. dr. Eris Rusi, përgjegjës i Departamentit të Gjuhës dhe Letërsisë.
Më pas, fjalë përshëndetëse mbajtën kryetari i Shoqatës “Sonce”, Vasil Steriovski; rektori i Universitetit “Fan S. Noli”, prof. dr. Lorenc Ekonomi; dekane e FEF, prof. as. dr. Jonela Spaho; kryetari i Këshillit të Qarkut Korçë, Petrika Tollkuçi, si dhe kryetari i Bashkisë Pustec, Pali Kolefski.
Të pranishmit theksuan rëndësinë e projektit kulturor që synon jo vetëm rikrijimin e veshjeve tradicionale të pakicave në qark, por edhe forcimin e ndërgjegjësimit dhe respektit ndaj diversitetit kulturor që karakterizon zonën e Korçës.
Prof. as. dr. Daniela Stoica prezantoi karakteristikat e kostumit arumun dhe veçoritë e tij në trevën e Korçës, ndërsa kostumografja Lirika Pojani ekspozoi veshjet e punuara në përputhje me origjinalitetin e tyre.
Gjatë aktivitetit u prezantua edhe një broshurë informuese që dokumenton traditat, elementet etnografike dhe trashëgiminë kulturore të komuniteteve maqedonase, arumune dhe rome në qark.
