Një tjetër ditë tragjike për median ndërkombëtare në Rripin e Gazës. Një gazetare 33-vjeçare, e cila punonte si freelance për Associated Press (AP) dhe disa media të tjera, u vra sot gjatë bombardimit izraelit mbi Spitalin Nasser në Khan Younis, në jug të enklavës së rrethuar.
Së bashku me të, humbën jetën edhe katër gazetarë të tjerë – mes tyre reporterë dhe fotografë nga Reuters, Al Jazeera dhe media vendase. Autoritetet shëndetësore raportojnë se sulmi ajror shkaktoi dhjetëra viktima gjithsej.
E diplomuar në Universitetin Al-Aqsa, ajo kishte nisur karrierën si gazetare në vitin 2015. Ditët e fundit ishte vendosur pranë Spitalit Nasser, ku raportonte për krizën humanitare, me fokus tek fëmijët e sëmurë nga uria.
Në një prej postimeve të saj të fundit në rrjetet sociale, ajo kishte bërë apel për mbrojtjen e gazetarëve në Gaza, duke shkruar se “asnjë vend nuk është i sigurt”.
Që nga nisja e konfliktit më 7 tetor 2023, mbi 240 gazetarë palestinezë janë vrarë, duke e kthyer Gazën në zonën më të rrezikshme në botë për profesionin e medias.
